काठमाडौं, सत्तारुढ दल नागरिक उन्मुक्ति पार्टीको पहिलो अधिवेशन आजदेखि सुरु हुदै छ ।
रेशम चौधरी संरक्षक रहेको नागरिक उन्मुक्ति पार्टीको अधिवेशन कैलालीको टीकापुरमा हुन लागेको हो ।
आजदेखि शनिबारसम्म चल्ने महाधिवेशनले पार्टीको नयाँ नेतृत्व चयन गर्नेछ ।
महाधिवेशनमा देशभरिबाट करिब ८ हजार प्रतिनिधिहरू सहभागी भएको सो पार्टीले जनाएको छ ।
आगामी नेतृत्व सर्वसम्मत चयन गर्ने तयारी गरिएको छ । जेलमा रहेका बेला स्थापना गरेको पार्टीको नेतृत्व आफै सम्हाल्ने योजनामा चौधरी छन् ।
महाधिवेशनले २८ पदाधिकारीसहित ५०१ सदस्यीय केन्द्रीय समितिको निर्वाचन गर्नेछ ।
विधानअनुसार नागरिक उन्मुक्तिले महाधिवेशनबाट अध्यक्ष, सहअध्यक्ष, सात उपाध्यक्ष, महासचिव, ७ सहसचिव र एक कोषाध्यक्ष निर्वाचित गर्नेछ ।
०७९ सालको आम निर्वाचनमा पहिलो पटक भाग लिएर ४ सिट जितेको नागरिक उन्मुक्ति कैलालीमा सबैभन्दा ठुलो राजनीतिक दल बनेको छ ।
टीकापुर घटनापछि जेल परेका संरक्षक चौधरीले जेलबाटै श्रीमती चौधरीलाई अध्यक्ष बनाएर पार्टी गठन गरेका थिए ।
