संसदको संयुक्त बैठकअघि प्रमुख सचेतक र सचेतकसँग छलफल गर्दै सभामुख घिमिरे

काठमाडौं, सङ्घीय संसदको संयुक्त बैठकअघि सभामुख देवराज घिमिरेले प्रमुख राजनीतिक दलका प्रमुख सचेतक र सचेतकसँग परामर्श गर्ने भएका छन् ।

उनले दिउँसो १२ः३० बजे दलका प्रमुख सचेतक र सचेतकसँग परामर्श गर्ने भएका हुन् ।

सभामुख सापकोटाले दिउँसो १ बजे कार्यव्यवस्था परामर्श समितिको बैठक बोलाएका छन् ।

आजको संसद् बैठकमा सरकारको आगामी आर्थिक वर्षको नीति तथा कार्यक्रम प्रस्तुत गर्ने कार्यसूची छ । संसद् सचिवालयले सुरक्षा प्रबन्धलगायत साजसज्जाको तयारी पूरा गरेको जनाएको छ ।

राष्ट्राध्यक्षबाट अपरान्ह ३ बजे प्रस्तुत हुने उक्त कार्यक्रमको तयारीमा संसद् सचिवालय युद्धस्तरमा जुटेको छ ।

सरकारको वार्षिक बजेट अघि सङ्घीय संसदका दुवै सदनमा वार्षिक नीति तथा कार्यक्रम प्रस्तुत गर्ने परम्परा छ ।

मन्त्रिपरिषद्को सिफारिसमा नेपालको संविधानको धारा, ९५ बमोजिम दुवै सदनको संयुक्त बैठकमा नीति तथा कार्यक्रम प्रस्तुत हुने कार्यक्रम निर्धारण भएको कार्यसूची पनि संसद् सचिवालयले सार्वजनिक गरिसकेको छ ।