काठमाण्डू, क्यानडामा जारी चौथो सिजनको ग्लोबल टी–२० मा नेपाली कप्तान रोहितकुमार पौडेलआबद्ध टोरन्टो नेसनल्सले सर्रे जग्वार्ससँग ८० रनको फराकिलो हार बेहोरेको छ ।
सोमबार आज बिहान सम्पन्न खेलमा सर्रेले दिएको १ सय ६२ रनको लक्ष्य पछ्याएको टोरन्टो १७।१ ओभरमा ८१ रनमै अलआउट भयो ।
उसका लागि उन्मुक्त चन्दले २१, रस्सीभान डर दुसेनले १५, निकोलस किर्तनले ११ र रोहित पौडेलले १० रन जोडे ।
रोहितले २५ बलमा १० रन जोडेका हुन् । त्यसक्रममा उनले एउटा चौका पनि हिर्काउन सकेनन् ।
खराब फिल्डिङका कारण जीवनदान पाए पनि रोहितले त्यसको फाइदा उठाउन सकेनन् । उनले ग्लोबल टी–२० मा पहिलोपटक ब्याटिङ गरेका हुन् ।
रोहितले अघिल्लो खेलमा ब्याटिङको मौका पाएका थिएनन् । उक्त खेलमा उनले फिल्डिङमार्फत महत्वपूर्ण दुई विकेट दिलाउन भने भूमिका खेलेका थिए ।
तेस्रो खेलमा लज्जास्पद पराजय बेहोरेपछि टोरन्टो अंक तालिकाको दोस्रो स्थानमा खस्किएको छ ।
रोहितसम्मिलित टोरन्टोले चौथो खेल मंगलबार राति ८ः४५ मा ब्राम्टन वुल्भ्ससँग खेल्ने तालिका छ ।
यस्तै, सन्दीप लामिछाने र दीपेन्द्र सिंह ऐरीआबद्ध भ्यानकुभर नाइट्सले अब चौथो खेलमा ब्राम्टन वुल्भ्सको सामना गर्नेछ ।
यी दुई टिमबीचको खेल बिहीबार बिहान १ः४५ देखि सुरु हुनेछ ।
