काठमाण्डू, पशुपति मन्दिरमा एक महिनासम्म आयोजना भएको कोटिहोममा आम्दानीभन्दा खर्च धेरै भएको विवरण आयोजकले सार्वजनिक गरेको छ ।
कोटिहोम सकिएको झन्डै एक महिनापछि आय व्यय विवरण सार्वजनिक गर्दै अपत्यारिलो खर्च विवरण आयोजक मानव सेवा फाउन्डेसन र महायज्ञ संङकल्पकर्ता विजय भण्डारीले सार्वजनिक गरेका हुन् ।
एक महिनासम्म गोप्य राखिएको हिसाब चौतर्फी दवाव भएपछि आयोजकले सार्वजनिक गर्न बाध्य भयो । तैपनि विश्वसनीय देखिँदैन् ।
विजय भण्डारीका अनुसार कोटिहोममा कुल २० करोड १५ लाख ८२ हजार ४९० रुपैयाँ १५ पैसा बराबर नगद र द्रव्य दान संकलन भएको थियो ।
कोटिहोमका लागि २० करोड ८८ लाख ३२ हजार ७९४ रुपैयाँ ३८ पैसा खर्च भएको दावी गरिएको छ ।
यस अनुसार ७२ लाख ५० हजार ३०४ रुपैयाँ घाटा भएको दावी छ ।
जबकि आयोजक सदस्यहरूले नै महायज्ञको दोस्रो सातासम्म दिनमा डेढ करोड रुपैयाँका दरले दैनिक चन्दा दान संकलन भइरहेको भन्दै युट्युब मिडियामा बोलेका थिए ।
त्यो हिसाबले ३२ दिन चलेको महायज्ञको आधा समयमै २० लाख करोड रुपैयाँ खर्च उठेको दान सचिवालयका कार्यरत केही कर्मचारीको दावी छ ।
तर, आयोजकले भने जम्मा २० करोड १५ लाख ८२ हजार दान उठेको भन्दै उल्टो ऋणमा डुबेको दावी गरेको छ ।
महायज्ञमा कबोल भएको मध्ये डेढ करोडदेखि २ करोड रूपैयाँ आउन बाँकी रहेको आज आयोजित पत्रकार सम्मेलनमा जानकारी दिइयो ।
यो रकम आयो भने बचत हुने भण्डारीले बताए । सार्वजनिक विवरण अनुसार नगद रसिदबाट १७ करोड ४६ लाख ३७७ रुपैयाँ संकलन भएको थियो ।
क्यूआर पेमेन्टबाट १ करोड ३६ लाख ७९ हजार ३४० रुपैयाँ उठेको थियो । दान पेटिकामा ४१ लाख ७७ हजार रूपैयाँ प्राप्त भएको थियो ।
आयोजक मध्येकै एक सदस्य भन्छन्, ‘‘महायज्ञमा करिब १३्१४ करोड हाराहारीमा खर्च भएको देखिन्छ ।
पैसा पनि ३० करोड भन्दा माथि नै उठेको जस्तो देखिन्थ्यो । तर, लामो गृहकार्यपछि घाटा देखाएर हिसाब सार्वजनिक भयो । हामी नै चकित परेका छौँ ।’’
रहस्यको कुरा, आयोजकले रसिद सबै लुकाएको छ । यसले आयोजकले दाबी गरेकै अनुसार चन्दा दान संकलन भएको पत्याउन सकिँदैन ।
अनि खर्च दावी गरेको बिवरण सार्वजनिक भएपनि त्यो खर्च कसरी भएको भनेर देखाइएको छैन् ।
केहीको पनि बिल र रकम बुझेको रसिद देखाइएको छैन्। अर्को कुरा महिना दिनको लागि कर्मचारी खर्च भन्दै पाँच करोड रुपैयाँ खर्च देखाइएको छ ।
तर, महायज्ञमा खटिएका कर्मचारी भने पैसा नभएको भन्दै आन्दोलनमा छन् । आयोजकले भने भोलेन्टियरको रुपमा खटाएको भनेको थियो ।
तर, अहिले पाँच करोड रुपैयाँ उनीहरूकै लागि खर्च भएको दावी गरेको छ ।
साउनभर चलेको महायज्ञबाट उठेको रकमले मामाघर अनाथालय आश्रम, ललितपुर र छोरीको घर ज्येष्ठ नागरिक आश्रम, भक्तपुरको भवन निर्माणलगायत मानवीय सेवाका लागि सहयोग जुटाउने योजना थियो ।
तर, अहिले आयोजकले ७२ लाख घाटा भएको विवरण सार्वजनिक गरेको छ । हिसाब लुकाएर भक्तजनलाई ठगी गरिएको भन्दै भक्तजनहरूले आक्रोश पोखेका छन् ।
मामाघर अनाथालय आश्रमले अनाथ र आधारभूत आवश्यकताबाट वञ्चित बालबालिकालाई निःशुल्क भोजन, आवास तथा स्वास्थ्य र शिक्षा प्रदान गर्दै आएको छ । अब उनीहरुले न त आश्रम बनाउनेछन् न त कुनै काम नै गर्नेछन् ।
कोटीहोमका क्रममा खटिएका स्वयंसेवकहरू र सामान उपलब्ध गराएका व्यापारीहरूले अझै पनि भुक्तानी नपाएको गुनासो गरिरहेका छन् ।
