काठमाण्डू, महिला त्रिकोणात्मक टी-२० क्रिकेट सिरिजमा नेपाल नेदरल्याण्ड्ससँग पराजित भएको छ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा बिहीबार भएको उद्घाटन खेलमा घरेलु टोली नेदरल्याण्ड्ससँग २० रनले पराजित भएको हो ।
नेदरल्याण्ड्सले दिएको १५८ रनको लक्ष्य पछ्याएको नेपालले २० ओभरमा ७ विकेटको क्षतिमा मात्र १३७ रन बनाउन सक्यो ।
नेपालका लागि ओपनर सीता राना मगरले २८ रन बनाउँदा कविता जोशीले २७ रन बनाइन् ।
पूजा महतोले विस्फोटक ब्याटिङ गरिन् । उनले १४ बलमा २ चौका र २ छक्कासहित २४ रन जोडिन् ।
कप्तान इन्दू बर्मा ७ रनमै आउट हुँदा कविता कुँवरले ८ र रुबिना क्षेत्रीले ११ रन बनाइन् । यस्तै, विन्दू रावल ३ रनमा अविजित रहिन् ।
नेदरल्याण्ड्सका लागि क्यारोलि डे लान्गे र इभा लिन्चले दुई/दुई तथा इरिस ज्विलिङले १ विकेट लिइन् ।
यसअघि टस हारेर ब्याटिङ गरेको नेदरल्याण्ड्सले निर्धारित २० ओभरमा ४ विकेटको क्षतिमा १५७ रन बनाएको थियो ।
नेदरल्याण्ड्सका रोबिन राइकेले अर्धशतकीय पारी खेलिन् । उनले ४८ बलमा ८ चौका प्रहार गर्दै ५९ रन जोडिन् ।
ओपनर फेबे मोल्केनबोयर शून्यमा आउट हुँदा स्टेरे कालिस र कप्तान बाबेट डे लीडेले क्रिज सम्हालेका थिए ।
कालिसले २९ रन बनाउँदा लीडेले ६ रनमै आउट भइन् । हेदर सिगर्सले २३ रन जोड्दा आइरिस जुइलिङ ३१ रनमा अविजित रहिन् ।
नेपालका लागि ईश्वरी विष्ट, सीता राना मगर, कविता कुँवर र पूजा महतोले एकरएक विकेट लिइन् ।
नेदरल्याण्ड्सविरुद्धको खेलमा अलिशा के यादव र मनिषा उपाध्यायले राष्ट्रिय टोलीमा डेब्यू गरेकी छन् ।
अलिशा नेपालका लागि डेब्यू गर्ने ३४ औं खेलाडी बनिन् भने मनिषा ३५औं खेलाडी । अब शुक्रबार थाईल्याण्ड र नेदरल्याण्ड्सबीच प्रतिस्पर्धा हुनेछ ।
