काठमाण्डू, अस्ट्रेलियाको नर्दन टेरिटोरीमा जारी टप एन्ड टी–२० सिरिजअन्तर्गत नेपालले आफ्नो दोस्रो खेलमा बंगलादेश ‘ए’ को सामना गर्दैछ ।
नेपाल र बंगलादेश ‘ए’ बीचको खेल खेल डार्विनस्थित मरारा क्रिकेट ग्राउण्ड–२ मा दिउँसो सवा ३ बजेदेखि शुरु हुनेछ ।
नेपाली टोलीको कप्तानी रोहित पौडेलले सम्हाल्नेछन् । बंगलादेश ‘ए’ को टिममा नुरुल हसन कप्तान छन् ।
यी दुवै टोलीले पहिलो खेलमा हार बेहोरेका थिए । नेपाल एनटी स्ट्राइकसँग ४२ रन तथा बंगलादेश ‘ए’ पाकिस्तान शाहीन्ससँग ७९ रनले पराजित भएका थिए ।
आजको खेल दुवै टोलीका लागि पहिलो जीत दिलाउने अवसरका रूपमा रहनेछ ।
गत सिजनमा उपविजेता बनेको बंगलादेश ‘ए’ टोलीमा अन्तर्राष्ट्रिय अनुभवसम्पन्न खेलाडी रहेका छन् ।
हालै सम्पन्न बंगलादेश प्रिमियर लिगमा उत्कृष्ट प्रदर्शन गरेका केही खेलाडीसमेत टोलीमा समावेश छन् ।
नेपाली टोलीले बंगलादेश ‘ए’ पछि मेलबर्न स्टार्स, होबार्ट हरिकेन्स, मेलबर्न रेनेगेड्स र पाकिस्तान शाहीन्ससँग प्रतिस्पर्धा गर्नेछ ।
