काठमाण्डू, साफ यू–१७ पुरुष च्याम्पियनसिप फूटबल प्रतियोगितामा सोमबार नेपाली टोलीले आफ्नो पहिलो खेल आयोजक श्रीलंकासँग खेल्दैछ ।
उद्घाटन खेल श्रीलंकाको राजधानी कोलम्बोमा नेपाली समयअनुसार, साँझ ७:१५ बजे शुरू हुनेछ ।
प्रतियोगितामा दक्षिण एसियाका सात वटा राष्ट्रको सहभागिता रहेको छ । समूह ‘ए’ मा नेपाल र आयोजक श्रीलंकासँगै बंगलादेश पनि रहेको छ ।
यसैगरी, समूह ‘बी’ मा भुटान, भारत, माल्दिभ्स र पाकिस्तान रहेका छन् । समूह चरणमा सबै सहभागी टोलीले एक–अर्कासँग एकरएक खेल खेल्नेछन् ।
त्यसपछि अंक तालिकाको माथिल्लो स्थानमा रहने दुई/दुई टोली प्रतियोगिताको सेमिफाइनलमा पुग्नेछन् । प्रतियोगिता सेप्टेम्बर २७ तारिखसम्म चल्नेछ ।
नेपाली टोलीले आफ्नो दोस्रो खेल बिहीबार बंगलादेशसँग खेल्नेछ ।
नेपालले हालसम्म यो प्रतियोगिताको उपाधि जित्न सकेको छैन । नेपाली टोली चार पटक फाइनलमा पराजित भएको छ ।
भारतले हालसम्म ६ पटक यो प्रतियोगिताको उपाधि चुमिसकेको छ ।
भारत प्रतियोगिताको साबिक विजेता पनि हो । बंगलादेशले दुई र पाकिस्तानले एकपटक उपाधि जितेका छन् ।
यो प्रतियोगिता पहिले यू–१५ र यू–१६ उमेर समूहमा खेलाइन्थ्यो ।
