काठमाण्डू, एएफसी एसियन कप छनोटको दोस्रो लेगमा पनि नेपाल भियतनामसँग १-० गोल अन्तरले पराजित भएसँगै प्रतियोगिताबाट बाहिरिएको छ।
घरेलु मैदानमा हुनुपर्ने यो खेल नेपालले भियतनामकै मैदानमा प्रतिस्पर्धा गरेको थियो। एसियन कप छनोटमा नेपाल लगातर चौथो हारसँगै छनोट सम्भावनाको औपचारिक अन्त्य भएको छ।
नेपाल खेलको पाँचौं मिनेटमा नै खेलमा पछि पर्यो। नेपालका डिफेन्डर सुमन श्रेष्ठले आत्मघाती गोलमा भियतनामले अग्रता लियो।
जुन गोल नै निर्णायक बन्यो। ट्रोङ् टाएनलेको कर्नरमा नुयन हिउले हानेको बल सुमनको खुट्टामा डिफ्लेक्ट भएर आफ्नै पोस्टमा गोलमा परिणत हुन पुगेको थियो।
नेपालविरुद्ध घरेलु टोली भियतनामले दोस्रो हाफमा पनि दबाब बनायो। तर, पाएको मौकालाई सदुपयोग गर्न नसक्दा अग्रता दोब्बर बनाउन सकेन।
नेपालले पनि ८५ औँ मिनेटमा गोल गर्ने मौका गुमाउँदा सम्भावित बराबरीको मौका चुकायो। जितसँगै भियतनामले महत्वपूर्ण ३ अंक जोड्न सफल रहयो।
आजको खेल भारी वर्षाको कारण आधा घन्टा ढिला शुरू भएको थियो। आज नेपालका रोहित चन्दले १ सयौँ अन्तर्राष्ट्रिय खेल खेले।
नेपाल पहिलो लेगमा ३(१ ले हारेको थियो। नेपाल भियतनामसँग चौथो भेटमा चौथो पटक नै पराजित भएको हो।
यसअघि नेपाल पहिलो खेलमा लाओससँग २-१ ले र मलेसियासँग २-० ले हारेको थियो।
ग्रुप ‘एफ’ मा शीर्षस्थानमा रहेको मलेसियासँग १२ अंक रहेको छ। भियतनाम ९ अंकसहित दोस्रो स्थानमा रहँदा लाओसको ३ अंक रहेको छ।
नेपाल भने अंकविहीन रहेको छ।
