देशको पश्चिमी भूभागको उपल्लो वायुमण्डलमा विकसित न्यून चापीय प्रणाली र स्थानीय वायुको संयुक्त प्रभावका कारण माैसममा परिवर्तन हुँदा हिमाली तथा पहाडी क्षेत्रमा वर्षा र हिमपात हुने तथा तराईका केही भूभागमा गर्मी अझै बढ्ने सम्भावना देखिएको रहेकाे छ ।
जल तथा मौसम पूर्वानुमान महाशाखाका अनुसार अहिले गण्डकी र कर्णाली प्रदेशका हिमाली तथा पहाडी भेगमा साधारणतया बदली भएकाे छ भने बाँकी पहाडी क्षेत्रमा आंशिक बदली र तराईका अधिकांश भूभागमा मौसम मुख्यतया सफा रहेकाे छ ।
त्यसैगरि कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भागका केहि स्थानहरूमा हल्का वर्षा भइरहेको छ । यता भैरहवामा भने ह्वात्तै तापक्रम बढेर ४१ डिग्री पुगेकाे महाशाखाले जनाएकाे छ ।
आज दिउँसो देशका हिमाली तथा पहाडी भूभागमा साधारणतया बदली हुनुका साथै मधेस र कोशी प्रदेशका तराईका एक-दुई स्थानमा मेघगर्जन र चट्याङसहित मध्यम वर्षा र हिमपातको सम्भावना रहेको छ । वर्षासँगै मधेस, कोशी, बागमती र गण्डकी प्रदेशका तराई क्षेत्रमा भने तापक्रम थप बढ्ने अनुमान गरिएको छ ।
आज राति देशका हिमाली भेगमा साधारणतया बदली हुनुका साथै मधेस र कोशी प्रदेशको तराई क्षेत्रमा आंशिक बदली हुनेछ भने बाँकी तराई क्षेत्रमा मौसम मुख्यतया सफा रहनेछ । कोशी र मधेस प्रदेशसहित बागमतीको हिमाली तथा पहाडी भाग र गण्डकी तथा कर्णालीका हिमाली क्षेत्रका थोरै स्थानहरूमा हल्का वर्षा र हिमपातको सम्भावना रहेको महाशाखाले जनाएकाे छ ।
