काठमाण्डू ,धार्मिक आवरणमा ठगी धन्दा गर्दै आएका विजय भण्डारी पक्राउ पर्ने डरले भागेपछि छानबिन समिति कामविहीन भएको छ ।
उनै भण्डारीलाई पक्राउ गर्न गएको प्रहरी टोलीसँग कोटिहोम आयोजकको झडप भएको घटना छानबिन गर्न गठित समितिमा बयान दिन नगएपछि समितिको म्याद पाँच दिन थपिएको छ ।
काठमाडौं उपत्यका प्रहरी कार्यालयले भण्डारीको कसूरबारे अनुसन्धान गरिरहेको छ । सरकारी लिखतसम्बन्धी किर्ते अपराध र अरू केही मुद्दामा समेत तत्काल पक्राउ पर्ने खतरा देखिएपछि भण्डारी भागेका हुन् ।
प्रहरीको निगरानीमा रहेका भण्डारी र उनको टोली नगएपछि छानबिन समितिको काम पूरा हुन सकेको छैन् ।
महिना दिनसम्म लगाइएको कोटिहोमको हिसाबकिताबसमेत सार्वजनिक नगरेका उनी अहिले सार्वजनिक कार्यक्रममा समेत देखिएका छैनन् ।
घटनालगत्तै उनी पोखरा गएका थिए । पोखरामा समेत कोटिहोम लगाउने प्रस्ताव गरे । आफ्ना पक्षमा समर्थक बटुल्ने प्रयास गरे ।
काठमाडौंमा कोटिहोम सफल भएको भन्दै चर्चा गरे । तर, कैयन् ठगी घटनामा संलग्न भएका उनलाई पोखरेलीले पत्याएनन् ।
आफ्नो साथमा माहौल नबन्ने देखेर काठमाडौं फर्किएका उनी छानबिन समितिमा बयानको लागि समेत गएका छैनन् ।
भण्डारीसहित उनका टिमका नीलम शाहलगायत सदस्यहरूसमेत छानबिन समितिको सम्पर्कमा छैनन् ।
के थियो घटना ?
साउन महिनाभर पशुपतिनाथ क्षेत्रमा चलेको का मुख्य सङ्कल्पकर्ता भनिएका कथित बाल योगेश्वर श्री विजय कृष्णमूर्तिजी महाराज ऊर्फ विजय भण्डारीलाई पक्राउ गर्न गौशाला प्रहरी वृत्तको टोली गएको थियो ।
भण्डारीले विभिन्न मिडियामा अन्तर्वार्ता दिँदै आफूले कुनै पनि किसिमको अपराध नगरेको र प्रहरी प्रधान कार्यालयबाट चारित्रिक प्रमाणपत्र (Character Certificate) लिएको दाबी गर्दै देखाएका थिए ।
तर, प्रहरीको प्रारम्भिक अनुसन्धानले भण्डारीको दाबीलाई असत्य प्रमाणित गरेपछि उनले पाएको प्रमाणपत्रको स्रोत पत्ता लगाउन भन्दै सोधपुछ गर्न उनलाई लिन गएको थियो ।
विजय भण्डारी ठगीको आरोपमा २ वर्ष जेलमा बसेर छुटेका व्यक्ति हुन् । उनीविरुद्ध आधा दर्जन बढी जाहेरी प्रहरीमा छन् ।
केही मुद्दा अदालतमै विचाराधीन छन् । यस्तो अवस्थामा उनले कुनै अपराधमा संलग्न नभएको प्रमाणपत्र पाएपछि उनलाई सोधपुछ गर्ने तयारीमा प्रहरी थियो ।
त्यो मनसायमा साउन ३२ गते राति पशुपति मन्दिर परिसरमा प्रहरी टोली गएको थियो ।
सुरुमा भण्डारी आफ्नै गाडीमा बसेर प्रहरी चौकी जाने भन्दै तयार भए । तर, पछि उल्टै प्रहरीलाई चुनौती दिए ।
फेसबूक लाइभ गर्दै आफ्ना अनुयायीहरूलाई प्रहरीको प्रतिकार गर्न उक्साए ।
आफ्नो गिरफ्तारी प्रयासविरुद्ध भण्डारी यति प्रतिक्रिया दिए कि गुन्डा नाइकेको रूप देखाए । यसले स्थिति तनावपूर्ण बनायो । प्रहरी तथा भण्डारीका समर्थकहरू बीच झडप भयो ।
घटनामा केही प्रहरी अधिकारीहरू र भण्डारीका समर्थकहरू घाइते भए । त्यो दिन पक्राउ पर्ने डरले भण्डारी त्यही कोटिहोम लगाइएको ‘विवादित’ स्थानमै सुते ।
किनकि बाहिर निस्किएमा पक्राउ पर्ने जोखिम थियो । तर, धर्मसँग जोडेर कार्यक्रम भइरहेकाले प्रहरीले भित्र हलमा छिरेर पक्राउ गर्न तयार भएन ।
एक रात त उनी जसोतसो प्रहरीबाट बचे । तर, धेरै दिन लुक्नछिप्न सम्भव थिएन । उनले आइडिया लगाए, आफ्ना पक्षमा माहौल बनाउन ।
हिन्दू राष्ट्रको माग राखेकोमा आफूलाई प्रहरीले गिरफ्तार गर्न लागेको भनेर उनले विषयान्तर गरे । खासमा उनले फौजदारी अपराध गरेका थिए ।
धर्मको आवरणमा ठगी :विजय भण्डारीविरुद्ध पुरातात्त्विक सम्पदामा क्षति पुर्याएको अर्को मुद्दा आकर्षित
नेपालमा हिन्दू राष्ट्र माग गर्ने उनी एक्ला होइनन् । हिन्दू राष्ट्रका पक्षमा धेरै समर्थक छन् । तर, भण्डारीले ती हिन्दूवादीलाई आफ्नो कित्तामा ल्याउन उपाय लगाए ।
हिन्दू राष्ट्र मागेपछि पक्राउ गर्न आएको’ भन्ने प्रचार गरे । भोलिपल्ट बिहान माइतीघरमा जुलुस गर्न सानो झुण्ड लिएर गए । घटनाको गम्भीरतालाई ध्यानमा राख्दै प्रशासनले छानबिन समिति बनायो ।
काठमाडौंका प्रमुख जिल्ला अधिकारी ९प्रजिअ० जितेन्द्र बस्नेतसहित सरोकारवालाहरू बसेर कोटिहोम आयोजककै सहमतिमा सात सदस्यीय छानबिन समिति गठन भयो ।
समितिको संयोजकमा सहायक प्रमुख जिल्ला अधिकारी माधवप्रसाद ढुङ्गाना रहेका छन् । समितिले १५ दिनभित्र घटनाको सत्यतथ्य पत्ता लगाई प्रतिवेदन पेस गर्ने बताइएको थियो ।
तर, समितिका सदस्यले फोन गरेर बोलाउँदा भण्डारी र उनका समर्थक समेत गएका छैनन् । समितिको म्याद १६ गते सकिएको छ । तर, भण्डारी भने उही प्रहरीले पक्राउ गर्ने डरले गएका छैनन् ।
छानबिन समिति भने कोटिहोम आयोजक र प्रहरीबीचको झडपको विषयको हो । उनीमाथि छानबिन भइरहेको भने उनले पाएको प्रहरी रिपोर्टको हो ।
यसैले जुनसुकै बेला पक्राउ पर्ने खतरा देखेपछि भागिरहेका हुनसक्ने समितिकै सदस्यहरू बताउँछन् ।
छानबिन समितिका संयोजक सहायक प्रमुख जिल्ला अधिकारी ढुङ्गाना भन्छन्, “उहाँहरू आउनुभएको छैन् ।
विजय भण्डारीसहित उहाँको टोली कोही आएनन् । फोन गर्दा कहिले लाग्छ कहिले लाग्दैन । लागेको बेलामा बाहिर छु भन्छन् तर आउँदैनन् ।”
यसकारण भागिरहेछन् भण्डारी
भण्डारी ठगी आरोपमा २ वर्ष जेल परेर छुटेको रेकर्ड प्रहरीमा छ । तर, प्रहरीबाट ‘क्लियर’ चारित्रिक प्रमाणपत्र कसरी पाए भन्नेमा प्रहरीले पनि आन्तरिक छानबिन थालेको छ ।
प्रहरीकै डीएसपी दीपेश बस्यालको नेतृत्वमा अर्को आन्तरिक छानबिन समिति गठन गरिएको छ ।
प्रहरी प्रवक्ता दानबहादुर कार्की भन्छन्, “कसूर प्रमाणित भएर जेल बसेको मान्छेले कसरी चारित्रिक प्रमाणपत्र पाए भन्नेबारे अनुसन्धान भइरहेको छ ।
प्रहरी भित्रैबाट कसैले भण्डारीलाई प्रमाणपत्र दिलाउन सहयोग गरेको हो वा उनी आफैँले बनाएको हो । छानबिन भइरहेको छ । तर, जे भएपनि त्यो लिखत किर्ते हो । अपराध हो ।”
काठमाडौं उपत्यका प्रहरी कार्यालयले पनि यसबारे अनुसन्धान गरिरहेको छ । काठमाडौं उपत्यका प्रहरी कार्यालयका एक अधिकारी भन्छन्, “जेल बसेका मान्छेले प्रमाणपत्र कसरी लिए ? सरकारी लिखतसम्बन्धी किर्ते अपराधमा अनुसन्धान गरिरहेका छौँ ।”
