काठमाण्डू, मलेसियामा जारी महिला यू–१९ एसिया कप क्रिकेट प्रतियोगितामा नेपालले आज ‘सुपर फोर’ मा श्रीलंकासँग प्रतिस्पर्धा गर्दैछ ।
नेपाल र श्रीलंकाबीचको खेल बिहान ११ः४५ देखि सुरु हुनेछ ।
प्रतियोगिताको समूह चरणको पहिलो खेलमा नेपालले पाकिस्तानविरुद्ध ६ विकेटको सानदार जीत निकालेको थियो ।
नेपाल र भारतबीचको खेल भने वर्षाका कारण रद्द भयो ।
मंगलबार बायोमास क्रिकेट मैदानमा नेपालले प्रस्तुत गरेको ९५ रनको लक्ष्य पछ्याइरहेको भारतले ३.१ ओभरमा विकेट नगुमाइ २८ रन बनाएको अवस्थामा पानी परेपछि खेल रोकिएको थियो ।
खेल रोकिएपछि भारत र नेपालले एकरएक अंक बाँडे । यो नतिजासँगै समूह ‘बी’ मा समान ३ अंक रहे पनि नेट रन रेटका भारत विजेता र नेपाल उपविजेता बन्दै सुपर चारमा पुगेका हुन् ।
समूह ‘बी’ मा नेपालसहित भारत र पाकिस्तान सहभागी थिए । एसिया कपको समूह ‘ए’ मा श्रीलङ्का, बङ्गलादेश र मलेसिया छन् । पाकिस्तान र मलेसिया प्रतियोगिताबाट बाहिरिएका छन् ।
सुपर फोको अर्को प्रतिस्पर्धामा नेपाल शुक्रबार बंगलादेशसँग भिड्नेछ । सुपर चारका शीर्ष दुई टिमले फाइनल खेल्नेछन् । फाइनल भिडन्त आइतबार बिहान हुनेछ ।
