काठमाण्डू, वुमन्स डे अन्तर्राष्ट्रिय क्रिकेट प्रतियोगितामा नेपालले आज नामिबियाको सामना गर्दैछ । नेपाल र नामिबियाबीचको प्रतिस्पर्धा दिउँसो १२ः४५ देखि सुरु हुनेछ ।
जारी प्रतियोगितामा यी दुवै टिम दोस्रो जीतको खोजीमा छ । नेपालले नामिबियाविरुद्ध हार बेहोर्दै प्रतियोगिताको सुरुवात गरेको थियो ।
दोस्रोमा खेलमा आयोजक युगान्डालाई एक विकेटले हराएको नेपाल तेस्रो म्याचमा हङकङसँग २ रनले स्तब्ध भयो ।
फाइनल सम्भावना कायम राख्न नेपाल र नामिबियाका लागि आजको खेल महत्वपूर्ण छ । नेपालसामु आज नामिबियाविरुद्ध हारको बदला लिने मौका छ ।
पहिलो खेलमा नामिबियाविरुद्ध नेपाल ९२ रनमै अलआउट भएको थियो । बलियो लक्ष्य दिन चुकेको नेपालले नामिबियाविरुद्ध ६ विकेटको हार बेहोर्यो ।
नेपाल आज उक्त हारको बदला लिँदै फाइनल सम्भावना कायमै राख्न चाहन्छ ।
नामिबियासँग नेपाली महिला टिमको यो दोस्रो भेट हो । जारी प्रतियोगितामा ब्याटिङमा सबै टिमले संघर्ष गरिरहेका छन् ।
