एजेन्सी, इजरायल र लेबनानको सशस्त्र समूह हिजबुल्लाहबीच भएको युद्धविराम सहमतिको संयुक्त राष्ट्रसंघ र अमेरिकाले स्वागत गरेका छन् ।
राष्ट्रसंघका महासचिव एन्टोनियो गुटेरेसले स्वागत गर्दै दुबै पक्षलाई युद्धविरामको सहमतिलाई कडाइका साथ कार्यान्व्यन गर्न आह्वान गरेका छन् ।
अमेरिकी राष्ट्रपति जो बाइडनले यसलाई सकारात्मक समाचार भन्दै गाजा युद्धमा युद्धविरामका लागि फेरि एकपटक पहल गर्ने आश्वासन दिएको एपीले जनाएको छ ।
इजरायल र हिजबुल्लाहबीच मंगलबार राति युद्धविराम गर्ने सहमति भएको हो । इजरायलले हिजबुल्लाहलाई लक्षित गरी लेबनानमा आक्रमण सुरु गरेपछि दुई देशबीच युद्ध जारी थियो ।
तर मंगलबार इजरायली सुरक्षा क्याबिनेटले युद्धविरामको प्रस्तावलाई स्वीकार गरेको छ । यससँगै १४ महिना लामो लडाइँपछि युद्धविराम सम्झौतामा सहमति भएको हो ।
सहमतिअनुसार इजरायली सेना दक्षिणी लेबनानबाट फिर्ता हुनेछ । यस्तै हिजबुल्लाहले पनि लितानी नदीको दक्षिणी सीमाबाट आफ्ना सशस्त्र समूहलाई फिर्ता गर्नेछ ।
युद्धविराम स्थानीय समयअनुसार बुधबार बिहान ४ बजे लागू भएको छ ।
