काठमाण्डू, युगान्डामा जारी वुमन्स डे टी–२० अन्तर्राष्ट्रिय क्रिकेट प्रतियोगितामा हङकङविरुद्ध नेपालले टस जितेर फिल्डिङ रोजेको छ ।
प्रतियोगितामा नेपाल दोस्रो जीतको खोजीमा छ । पहिलो खेलमा नामिबियासँग ६ विकेटले पराजित भएको नेपालले दोस्रो खेलमा आयोजक युगान्डाविरुद्ध एक विकेटको कठिन जीत निकालेको थियो ।
हङकङ पनि लगातार दोस्रो जीत निकाल्न चाहन्छ । पहिलो खेलमा युगान्डासँग ८ विकेटले पराजित भएको हङकङले दोस्रो खेलमा नामिबियालाई चार विकेटले हरायो ।
हालसम्म नेपाल र हङकङको महिलाले आठवटा टी–२० आईमा एकअर्काको सामना गरेको विगत छ, जहाँ नेपालले चार तथा हङकङले तीन खेल जितेको छ ।
यी दुई टिमबीचको एक म्याच भने नतिजाविहीन बनेको छ । नेपाल र हङकङ पछिल्लोपटक गत वर्षको फेब्रुअरीमा भिडेका थिए ।
उक्त प्रिमियर कपको खेल नेपालले ८ विकेटले जितेको थियो । नेपाल यसपालि पनि हङकङसँगको अपराजित यात्रा कायम राख्ने सोचमा छ ।
