एजेन्सी, दक्षिण कोरियाको सबैभन्दा खराबमध्येको तीव्र हावाका कारण फैलिएको डढेलोले देशको दक्षिणी क्षेत्रलाई ध्वस्त पारेको छ।
अधिकारीहरूका अनुसार आगलागीले २४ जनाको मृत्यु भएको छ भने २ सयभन्दा बढी संरचनाहरू नष्ट भएको तथा २७ हजार मानिसलाई विस्थापित हुन बाध्य पारेको छ।
यस्तै २६ जना घाइते छन् भने उनीहरूमध्ये १२ जनाको अवस्ता गम्भीर छ। मृतक र घाइतेमध्ये अधिकांश ६० वर्षमाथिका छन्।
आगलागीबाट सबैभन्दा बढी प्रभावित क्षेत्रहरूमध्ये एक दक्षिणपूर्वी उइसेङ जंगलमा लागेको डढेलो निभाउने प्रयासमा एउटा हेलिकोप्टर दुर्घटनाग्रस्त भएको अधिकारीहरूले बताएका छन्।
कोरिया वन सेवाले उद्धार कार्य जारी रहेको र विमानमा एक पाइलट मात्र थिए भन्ने अनुमान गरेको छ।
एक प्राचीन् बौद्ध मन्दिर, घरहरू, कारखानाहरू र सवारीसाधनहरूलगायत संरचनाहरू नष्ट भएका छन्। आगलागीबाट ४३ हजार ३ सय ३० एकड जमिन जलेको आपत्कालीन प्रतिक्रिया केन्द्रले जनाएको छ।
टेलिभिजन सम्बोधनमा दक्षिण कोरियाका कार्यवाहक राष्ट्रपति हान डक–सुले गत शुक्रबार सुरु भएको डढेलोले विगतका अन्य धेरै डढेलोको तुलनामा बढी क्षति पुर्याएको बताए। ‘क्षतिहरू बढ्दै छन्,’ हानले भने, ‘हामीसँग यस्ता डढेलोका क्षतिहरू हुन सक्छन्, जुन हामीले पहिले कहिल्यै अनुभव गरेका छैनौँ, त्यसैले हामीले यो हप्ताको बाँकी समयमा सबै डढेलोलाई निभाउन हाम्रा सबै क्षमताहरू केन्द्रित गर्नुपर्छ।’
हानले रातभरको तीव्र हावाका कारण डढेलो निभाउन कर्मचारीहरूलाई कठिनाइ परिरहेको बताए। उनले करिब ४ हजार ६ सय ५० अग्नि नियन्त्रक, सैनिक र अन्य कर्मचारीहरूले करिब १ सय ३० हेलिकोप्टरको सहयोगमा डढेलो निभाउन काम गरिरहेको बताए। उनले बिहीबार केही मात्रामा ५–१० मिलिमिटर पानी पर्ने अपेक्षा गरिएको बताए।
पर्यवेक्षकहरूका अनुसार जारी डढेलो दक्षिण कोरियामा जमिन जलेको सन्दर्भमा तेस्रो ठूलो हो।
अग्नि नियन्त्रकहरूले सुक्खा बतासका कारण आगलागी नियन्त्रण गर्न संघर्ष गरिरहेकाले धेरै दक्षिणपूर्वी शहर र सहरका अधिकारीहरूले मंगलबार बासिन्दाहरूलाई खाली गर्न आदेश दिएका थिए।
दक्षिण कोरियाको गृह मन्त्रालयका अनुसार सबैभन्दा ठूलो आगलागी अन्डोङ, छिमेकी र उइसेङ र सान्चेओङ काउन्टी तथा उल्सान शहरमा भएको थियो।
यसअघि मंगलबार अधिकारीहरूले ती क्षेत्रमा सबैभन्दा ठूलो डढेलोमध्ये अधिकांश निभाएको तर हावा र सुक्खा अवस्थाले आगो फेरि फैलिएको बताएका थिए। तर, हावा बढेपछि आगो निभाउने प्रयासहरू रातारात आंशिक रूपमा स्थगित गरियो।
उइसेङमा आगलागीले गाउन्सा मन्दिरका ३० भन्दा बढी संरचनामध्ये करिब आधा नष्ट गरेको छ।
यी संरचना मूल रूपमा सातौँ शताब्दीमा निर्माण गरिएको थियो। नष्ट भएका संरचनामध्ये दुई राज्य–निर्दिष्ट ‘खजाना’ –सन् १६६८ मा बनेको खोलामा बनाइएको मण्डप–आकारको संरचना र सन् १९०४ मा राजाको दीर्घायुको अभिव्यक्तिका लागि निर्माण गरिएको जोसेओन राजवंशको संरचना थिए।
सरकारी र बौद्ध अधिकारीहरूका अनुसार मन्दिरको अर्को राज्य–निर्दिष्ट ‘खजाना’ आठौँ शताब्दीमा निर्मित ढुङ्गाको बुद्ध मूर्तिलाई सुरक्षित स्थानमा सारिएको थियो।
कोरिया वन सेवाले मंगलबार राष्ट्रव्यापी रूपमा डढेलोको चेतावनी उच्च ‘गम्भीर’ स्तरमा बढाएको छ। यसले स्थानीय सरकारहरूलाई आपत्कालीन प्रतिक्रियामा थप कामदारहरू नियुक्त गर्न, वन र पार्कहरूका लागि प्रवेश प्रतिबन्धहरू कडा गर्न र सैन्य एकाइहरूलाई प्रत्यक्ष–आगो अभ्यास रोक्न सिफारिस गर्न आवश्यक परेको छ।
अधिकारीहरूका अनुसार मृतक १८ जनामध्ये चार जना अग्नि नियन्त्रक र सरकारी कर्मचारी छन्।
उनीहरू शनिबार सान्चेओङमा तीव्र हावाले गर्दा आगोको ज्वालामा फसेपछि मारिएका थिए।
सरकारी अधिकारीहरूले मानवीय त्रुटि सम्भवतः पारिवारिक चिहानहरूमा बढेको घाँस वा वेल्डिङको कामबाट स्पार्कहरू सफा गर्दा आगोको प्रयोगका कारण धेरै आगलागी निम्त्याएको आशंका गर्छन्।
