भारतको राजस्थानमा विद्यालय भवनको छत खस्दा ७ बालबालिकाको मृत्यु

एजेन्सी, भारतमा राजस्थानको झालावाड जिल्लामा एक सरकारी विद्यालय भवनको छत खस्दा ७ बालबालिकाको मृत्यु भएको छ। दुर्घटनामा २७ जना घाइते भएका छन्।

राजस्थानका शिक्षामन्त्री मदन दिलावरले घटनाको पुष्टि गरेका छन्। झालावाड जिल्लाको मनोहरथाना क्षेत्रमा रहेको विद्यालय भवनको छत शुक्रबार बिहान भत्किएको थियो।

दुर्घटना भएपछि स्थानीयले तत्कालत दुर्घटनामा परेका बालबालिकाको उद्धार गरेका थिए। घाइतेहरूलाई तत्काल नजिकको अस्पतालमा उपचारका लागि पठाइएको छ, जसमा केही शिक्षक पनि छन्।

शिक्षा विभागले जीर्ण भवनको अवस्थाबारेमा यसअघि नै प्रशासनलाई चेतावनी दिइसकेको थियो, तर प्रशासनले त्यसलाई गम्भीरतासाथ नलिँदा दुर्घटना भएको भारतीय सञ्चारमाध्यमले जनाएका छन्।

मानसुनअघि सबै सरकारी विद्यालयमा सुरक्षा उपाय सुनिश्चित गर्न शिक्षा विभागले आदेश जारी गरेको थियो । तर, यो आदेश जिल्लामा प्रभावकारी रूपमा लागू गरिएको थिएन।