एजेन्सी, अमेरिकाको टेनेसी राज्य एक भीषण पारिवारिक हत्याकाण्डले स्तब्ध भएको छ।
२९ वर्षीय अष्टिन रोबर्ट ड्रम्मन्डले चिनेजानेकै एक परिवारका चार सदस्यको गोली हानी हत्या गरेपछि, तिनको नवजात शिशुलाई गाडीमा राखी अर्को व्यक्तिको घरको आँगनमा छाडेर फरार भएको अमेरिकी अधिकारीहरूले बताएका छन्।
हत्या भएका चारै जना चिनेजानेकै
हत्यारो घोषित गरिएका ड्रम्मन्डले ३८ वर्षीया कोर्ट्नी रोज, उनका दुई सन्तान — २० वर्षीया एड्रियाना विलियम्स र १५ वर्षीय ब्रेडन विलियम्स — तथा एड्रियानाका प्रेमी २१ वर्षीय माइकल विल्सनलाई गोली प्रहार गरी हत्या गरेको बताइएको छ।
अमेरिकी सञ्चारमाध्यम एबिसीन्यूजका अनुसार, सबै मृतकहरू ड्रम्मन्डका नजिकका चिनेजानेका थिए।
शिशुलाई ज्यान बचाउने कसरत ?
हत्या मंगलबार टेनेसीको लेक काउन्टी नजिक भएको हो। हत्यापछि ड्रम्मन्डले एड्रियाना र माइकलको नवजात शिशुलाई कारमा राखेर डायर काउन्टीको एक घरको आँगनमा छाडेका थिए।
ती घरका बासिन्दाले शिशुलाई देखेर प्रहरीलाई खबर गरेपछि उद्धार गरिएको थियो। बालक हाल सुरक्षित अवस्थामा रहेको बताइएको छ।
यो ‘शिशुलाई बाँच्न दिने’ निर्णय हत्या गरिएका अभिभावकहरूप्रति पछुतो थियो कि सोचीविचारपूर्वक गरिएको कार्य — यसबारे अझै पुष्टि हुन सकेको छैन। तर, अमेरिकी प्रहरीले घटनालाई निकै क्रूर र त्रासदीपूर्ण बताएको छ।
हत्यारो फरार, १५ हजार डलर पुरस्कार
घटनापछि अष्टिन ड्रम्मन्ड फरार छन्। अधिकारीहरूले उनलाई सशस्त्र र अत्यन्त खतरनाकू मान्दै आम सर्वसाधारणलाई सचेत रहन आग्रह गरेका छन्।
टेनेसी राज्यका अनुसन्धानकर्ताहरूले उनको खोजी तीव्र पारिएको र सूचना दिने व्यक्तिलाई १५,००० अमेरिकी डलर पुरस्कार प्रदान गरिने घोषणा गरेका छन्।
उनको गाडी राज्यकै ज्याक्सन सहरमा भेटिएको छ। प्रहरीलाई उनी नजिकै कतै लुकेका हुन सक्ने आशंका छ।
उनलाई खोज्न ड्रोन, तालिमप्राप्त कुकुर र हवाई निगरानीसमेत प्रयोग गरिएको छ।
पहिले पनि आपराधिक रेकर्ड
ड्रम्मन्ड विरुद्ध चारवटा प्रथम श्रेणीको हत्याको अभियोग, अपहरण, र हतियार सम्बन्धी गम्भीर अभियोगहरू लगाइएको छ।
उनी पहिले पनि हत्या प्रयासको मुद्दामा जेल परेका थिए र धरौटीमा रिहा भएका थिए।
यसपटकको घटनाले प्रहरी तथा न्याय प्रणालीप्रति पनि प्रश्न उठ्न थालेको छ — यस्तो खतरनाक व्यक्तिलाई के धरौटीमा छुटाउनु उपयुक्त थियोरु
स्थानीय समुदायमा त्रास
लेक र डायर काउन्टीका बासिन्दाहरू घटनाबाट स्तब्ध छन्। स्थानीय विद्यालय, सार्वजनिक स्थलहरूमा सुरक्षा सतर्कता बढाइएको छ।
एक स्थानीय बासिन्दाले भने, “हामी यस्ता हिंसात्मक घटनाका लागि तयार छैनौं। अझ बच्चालाई सुरक्षित रुपमा छाडिएको सुन्नु एक मात्र सान्त्वना हो।”
हत्या र सामाजिक संकट
अमेरिकामा घरेलु हिंसा, पारिवारिक द्वन्द्व र हतियारको सजिलो पहुँचले जटिल मानवीय संकट निम्त्याइरहेको यो घटनाले पुनः उजागर गरेको छ।
यदि मानसिक स्वास्थ्य, कानूनी कडाई र हतियार नियन्त्रणमा समयमै ध्यान दिइएको भए यस्ता त्रासदी टार्न सकिन्थ्यो भन्ने आवाज पुनः उठ्न थालेको छ।
टेनेसी राज्यमा भएको यो घटनाले अमेरिकी समाजमा बढ्दो हिंसा, पारिवारिक संकट र कानूनी चुनौतीहरूलाई तीव्र रूपमा उजागर गरेको छ।
अष्टिन ड्रम्मन्ड अझै फरार छन्। चार जनाको निर्मम हत्या र त्यसपछि शिशुलाई जीवनदान दिएको घटनाले जटिल सामाजिक र मानवीय प्रश्नहरू खडा गरेको छ।
